magufuli atikisa tunduma ajisifia utendaji kazi

MGOMBEA urais wa Jamhuri ya Muungano wa Tanzania, Dk John Magufuli amesema katika uongozi wake katika sekta ya ujenzi, alijikuta akifukuza kazi makandarasi 3,200 walioonesha uzembe kazini.Dk Magufuli amesema hayo jana katika miji na vijiji mbalimbali vya Mkoa wa Songwe na kuongeza kuwa anachukia michakato na kupiga kalenda shughuli mbalimbali za Serikali.

Aidha katika mikutano mbalimbali aliyoifanya mkoani

Rukwa juzi, mgombea huyo wa CCM amesema siku zote ni mkweli na katika dhambi ambayo hajawahi kuifanya, ni kudanganya.
“Nitaunda Baraza la Mawaziri litakalojibu hoja na nitahakikisha linafanya kazi. Hapa kwangu masuala ya mchakato hapana wala njoo kesho hapana,” alisema.
Alisema waziri atakayeleta masuala ya michakato, ajichakate mwenyewe kwa kuacha kazi ili wenye uwezo wa kufanya kazi wachukue nafasi hiyo.
Mgombea huyo wa CCM, alisema Watanzania wamechoka kudhulumiwa haki zao na mafisadi, na sasa wanataka mabadiliko kuondokana na dhuluma hiyo.
Akizungumza katika mikutano hiyo na barabarani alipokuwa akisimamishwa na wananchi, Dk Magufuli alisema matakwa ya wananchi kwa sasa ni mabadiliko bora na si bora mabadiliko. Akielezea historia ya utendaji wake serikalini, alisema ametumikia serikalini kwa miaka 20 na wakati wote huo, hakuwahi kufukuzwa kazi kwa kuwa hakuwahi kudhulumu mtu.
Alisema anataka siku moja akifa na kwenda Mbinguni, akiulizwa alifanya nini, aseme amewatatulia Watanzania kero zao, hataki kuambiwa amedhulumu mtu.
Dk Magufuli alisema kama ameweza kusimamia ujenzi wa karibu Kilometa 17,000 za barabara za lami, ambapo Kilometa moja sawa na zaidi ya Sh bilioni moja, hatashindwa kutatua kero zingine za maji, umeme, dawa hospitalini.
Akielezea mbinu ya utekelezaji wa ahadi zake, Dk Magufuli aliwataka wananchi kumchagulia wabunge wengi kutoka CCM, apate nafasi ya kuteua mawaziri wazuri kutoka kwa wabunge hao kwa ajili ya utekelezaji wa ahadi hizo.
Akielezea ni namna gani atatatua kero ambazo pengine hazipo katika Ilani ya Uchaguzi, Dk Magufuli alisema yeye atasimamia Serikali tajiri kwa kuwa fedha zipo na kwamba tatizo la kutopatikana kwake ni matumizi mabaya ya baadhi ya watu ndani ya Serikali.
Mgombea huyo alisema ana hakika watu ambao wamekuwa wakijinufaisha na fedha za umma na kusababisha kero, ikiwemo ya ukosefu wa dawa, maji, umeme, ujenzi wa barabara na kero nyingine zitakazoletwa na wabunge na madiwani, atawashughulikia lakini na wao hawatampa kura kutokana na kuhofia alichoita ‘moto’ wake.
Dk Magufuli aliwataka Watanzania kwa ujumla wao, hasa wanaoathirika na ubadhirifu huo na rushwa, kumpigia kura kwa wingi ili ashinde na akawashughulikie wabadhirifu, walarushwa na mafisadi wanaotumia vibaya fedha hizo.
-HABARI LEO